Ançelottidən Ronaldoya dəstək

"Real"ın baş məşqçisi Karlo Ançelotti futbolçusu Kriştiano Ronaldonun "Atletiko"ya məğlubiyyətdən sonra özünə ad günü mərasimi keçirməsinə münasibət bildirib.

ANN.Az Qol.Az-a istinadən xəbər verir ki, futbolçuların şəxsi həyatına qarışmadığını bildirən italiyalı mütəxəssis Ronaldoya dəstək olub.

"Ronaldonun özünə ad günü keçirməsi mənim üçün problem yaratmadı. İndiyə qədər heç bir futbolçunun şəxsi həyatına qarışmadım. Bundan sonra da müdaxilə etməyəcəm. Futbolçularımın peşəkarlığına şübhəm yoxdur.

Əgər belə hadisələr üçün onların üzrxahlıq istəməsini tələb etsəm, bu, futbolçuların şəxsi həyatlarına müdaxilə etməyim kimi başa düşüləcək. Mən yalnız futbolçuların meydandakı peşəkarlığına müdaxilə edirəm. Bəli, "Atletiko"ya məğlubiyyətdən sonra bütün futbolçular məyus idi. Ancaq bu məğlubiyyət həm də onları növbəti oyunlara daha yaxşı kökləməlidir. Komanda düzgün yoldadır. Bunu sabah "Deportivo" ilə oyunda görəcəyik".

Qeyd edək ki, "Real"ın La Liqada "Atletiko"ya 0:4 hesablı məğlubiyyətindən sonra özünə ad günü mərasimi keçirən və orada şənlənən Ronaldonun mövsümün sonunda komandadan göndəriləcəyi iddia olunur.   

ANN.Az