Bu idmançılarımız dünya reytinqində birinci oldu

10 güləşçimizin adı reytinq siyahısına daxil edilib

Dünya Güləş Birliyi (UWW - United World Wrestling) 2015-ci il fevral ayında keçirilən yarışların nəticəsinə əsasən, yunan-Roma güləşi üzrə yeni reytinq siyasını açıqlayıb. ANS PRESS-in məlumatına görə, yunan-Roma güləşi üzrə reytinq siyahısında 10 güləşçimizin adı daxil edilib.

Ötən ay keçirilən Dünya Kuboku yarışında yeni bir tarix yazan yunan-Roma güləşçilərimiz reytinq sıralamasında da nəzərəçarpacaq uğura imza atıb. Rəsul Çunayev (71 kq) və Rafiq Hüseynov (80 kq) Dünya Kuboku yarışlarındakı nəticələrinə görə, fevral ayının reytinq sıralamasında birinci olublar. Məlumat üçün bildirək ki, Rafiq Hüseynov Dünya Kubokunda keçirdiyi 4 görüşdən hamısını qələbə ilə başa vurub. Finalda isə ötən ilin dünya çempionatının gümüş mükfataçısı Yevgeni Saleyevi üstələyib. Rəsul Çunayev isə Dünya Kubokunda keçirdiyi 3 görüşü qələbə ilə başa vurib, finalda dünya çempionu Çingiz Labazanovu üstələyib.

Dünya çempionatının gümüş mükafatını qazanan Saman Təhmasibi (85 kq) və bürünc mükafata sahib çıxan Elvin Mürsəliyev (75 kq) mövqelərini qoruyub. Onlar müvafiq olaraq siyahıda 2-ci və 5-ci yerdədi. Dünya çempionatını 5-ci sırada tamamlayan Həsən Əliyev (66 kq) isə Dünya Kuboku yarışındakı göstəricilərinə görə 2 pillə irəliləyərək 5-ci sırada qərarlaşıb. Dünya Kubokundakı uğurlu çıxışı İslam Abbasovun (85 kq) 13-cü pillədən 8-ə yüksəlməsi ilə nəticələnib.

59 kq
13. Taleh Məmmədov - Təxti Kuboku turniri 1-ci yer (16)

66 kq
5. Həsən Əliyev - DÇ 5-ci yer (7)
13. Kamran Məmmədov - Paris Qran Pri turniri 2-ci yer (13)

71 kq
1. Rəsul Çunayev - DK 1-ci yer (3)

75 kq
5. Elvin Mürsəliyev - DÇ 3-cü yer (5)

80 kq
1. Rafiq Hüseynov - DK 1-ci yer (11)

85 kq
2. Saman Təhmasibi - DÇ 2-ci yer (2)
8. İslam Abbasov - DK 1-ci yer (13)

98 kq
18. Orxan Nuriyev - Paris Qran Pri turniri 3-cü yer (18)

130 kq
17. Sabah Şəriəti - Qızıl Qran Pri Final mərhələsi 2-ci yer (16)

Qeyd: İdmançıların adları qarşısında onların iştirak etdikləri son yarışda əldə etdiyi nəticə, mötərizədə isə bundan əvvəlki reytinq siyahısında tutduqları yer göstərilib.