"Bu dəfəki məğlubiyyət bizə daha pis təsir etdi" - Venger

"Arsenal"ın baş məşqçisi Arsen Venger Çempionlar Liqasının 1/8 final mərhələsinin "Monako" ilə keçirilən cavab oyunu haqda danışıb.

Qol.Az-ın Britaniya mətbuatına istinadən verdiyi məlumata görə, fransız mütəxəssis turnirdə mübarizəni dayandırmağın komandasına çox pis təsir etdiyini bildirib:

"Futbol bir nağıl deyil. Reallığa əsaslanır. Rəqib yaxşı müdafiə olundu. Komandanın oyunundan razı qaldım. İki qol vurduq. Lakin bu mərhələni keçmək üçün yetərli olmadı. Bu uğursuzluğu öncəki illərdəki məğlubiyyətlərlə eyniləşdirmək düzgün deyil. Çünki daha öncə biz "Barselona" və "Bavariya"ya uduzmuşduq. Bu dəfəki məğlubiyyət bizə daha pis təsir etdi".

Qeyd edək ki, "Arsenal" səfərdə "Monako"ya 2:0 hesabı ilə qalib gəlsə, iki oyunun nəticəsinə görə turnirdə mübarizəni dayandırıb.