Azərbaycanlı futbolçu bombardir oldu

Rusiyanın U-19 yığmasının və "Zenit"in azərbaycanlı futbolçusu Ramil Şeydayev "Avro-2015"in bombardirlər siyahısına başçılıq edir.

Qol.Az-ın "Sportbox.az"a istinadən verdiyi məlumata görə, R.Şeydayev "Avro-2015"in seçmə və elit raund mərhələlərində keçirdiyi 6 oyunda 10 qol vurub.

Onun ən yaxın izləyicisi isveçrəli Nikolas Hunzikerin aktivində isə 5 qol var. Elit raund mərhələsində Belçika, İsveç və Litva ilə eyni qrupda mübarizə aparan Rusiya yığması bütün görüşlərdə qələbə qazanaraq birinci olub. Ramil Şeydayev İsveç (6:0) və Litva (3:1) ilə görüşlərdə dublla yadda qalıb.

Xatırladaq ki, AFFA daha öncə Ramil Şeydayevə Azərbaycan millisində oynamağı təklif etsə də, gənc futbolçu rədd cavabı vermişdi. "Azərbaycan millisində oynamaq təklifi aldım. Ancaq heç kəslə danışıqlarım olmayıb. Hazırda bütün fikirlərimi Rusiya yığmasına yönəltmişəm. Mən Azərbaycana hörmət edirəm. Ora mənim atamın vətənidir. Amma Rusiya millisində çıxış etmək istəyirəm. Ona görə də baş məşqçi Fabio Kapello dəvət gözləyəcəm. Fərq etməz, bir, iki və ya üç il" - deyə R.Şeydayev bildirib.