​Zabit Səmədov: "Dekabrda Badr Hari ilə döyüşə bilərəm"

"Report" xəbər verir ki, bu barədə o, "Vestnik Kavkaz"a müsahibəsində bildirib.

Zabit 2013-cü ilin mayında Moskvada mərakeşli Badr Hari ilə baş tutan döyüşün onun üçün xüsusi ilə yaddaqalan olduğunu bildirib.

"Ona qədər mən Hariyə artıq iki dəfə məğlub olmuşdum, üçüncü döyüşdə isə onu nokauta saldım. Bu, əlbəttə mənim üçün, bütün azərbaycanlılar üçün çox böyük qələbə idi. Çünki rəqib titullu idmançı idi. Mən Hari ilə bu ilin dekabrında Dubayda dördüncü dəfə üz-üzə gələ bilərəm", - deyə o əlavə edib.

Boksçu müsahibəsində Belarus, Azərbaycan və Şimali Qafqazda təknövçülüyün inkişafından danışıb:

"Mən Belarus yığmasının tərkibində dəfələrlə Avropa və dünya çempionu olmuşam, hazırda isə peşəkar kimi Azərbaycanın şərəfini qoruyuram.

Mən həvəskar kimi Belarus bayrağı altında üç dəfə Avropa və dörd dəfə dünya çempionu olmuşam.

Lakin peşəkar idmanda Vətənimin şərəfini qorumaq qərarına gəldim, axı mən Azərbaycan vətəndaşıyam.

Azərbaycanda bizim idman növünə çox yaxşı dəstək var. Dövlət idmançılara, yarışlara böyük diqqət ayırır, idman meydançaları tikilir. Tezliklə Bakıda ilk Avropa Oyunları keçiriləcək. Onun təşkilinə də Azərbaycanda böyük diqqət var. Ümid edirəm ki, Bakı-2015 Oyunları ən yüksək səviyyədə keçəcək. Mən həmin günlər Azərbaycana azarkeşlik etmək üçün mütləq Bakıda olacağam".