Güləşçilərin qanunsuz yaş dəyişdirmə hallarına qarşı tədbir

"Report" xəbər verir ki, bunu AGF-nin baş katibi Əjdər Cəfərov mayın 19-da "Sərhədçi" İdman Olimpiya Mərkəzində start götürəcək sərbəst və yunan-Roma güləşi üzrə yeniyetmələr arasında Azərbaycan çempionatı öncəsi ümumrespublika seminarında bildirib.

Ölkənin bütün region və bölgələrindəki klub və cəmiyyətlərin məşqçi-hakimlərinin qatıldıqları seminarda Ə.Cəfərov güləş idmanına yeni başlayan uşaqların sənədlərinin düzgün tərtib olunma və idmançıların nizam-intizam qaydaları barədə məlumat verib. O, klubların beynəlxalq yarışlarda federasiyanın icazəsi olmadan iştirakının yolverilməz olduğunu bildirib. Baş katib ölkədə güləş idman növünün daha da inkişafı üçün bütün işlərin Dünya Güləş Birliyinin (UWW) qaydalarına əsasən aparıldığını və bütün klub və cəmiyyətlərin də bu qaydalara əsasən işlərini qurmalı olduğunu deyib. O bildirib ki, idmançıların qanunsuz olaraq yaş dəyişdirməsinin qarşısı Azərbaycan qanunvericiliyinin tələblərinə uyğun olaraq alınacaq: "Qanunsuz yaş dəyişdirilməsi prosesi idmanda çox ciddi bir problemdir. Dünyanın bütün ölkələrində belə hallara rast gəlinir. Məhz buna görə, UWW bu prosesin qarşısını almaq üçün bütün milli federasiyalar qarşısında tələb qoyub. Azərbaycan qanunvericiliyində də bu məsələ birmənalı olaraq qadağan edilib. İstənilən halda güləşçilərin yaş dəyişdirməsi yolverilməzdir və belə bir halla rastlaşacağımız təqdirdə, bunun qarşısını qanun çərçivəsində alacağıq. Ona görə də məşqçilərdən işlərini qanun çərçivəsində qurmaları xahiş və tələb olunur".

Daha sonra Türkiyədən dəvət olunmuş təlimçi-mütəxəssis, UWW-nin elm departamentinin üzvü Ramazan Savranbaşı Avropa və dünya çempionatlarında yeniyetmə və gənclərin nailiyyətləri ilə onların böyüklər yaş qrupundakı nailiyyətlərinin statistik təhlili, müxtəlif yaş qruplarında güləş idman növünün tədrisi və məşq planlaması mövzusunda çıxış edib. Fotoşəkillər və video görüntülərdən hazırlanmış slaydlar üzərində fikir mübadiləsi aparılıb.