"Qarabağ"ın Çempionlar Liqasındakı potensial rəqibləri

Azərbaycan Premyer Liqasında sona iki tur qalmış çempionluğunu rəsmiləşdirən "Qarabağ" 2015/2016 mövsümündə ölkəmizi Çempionlar Liqasında təmsil edəcək.

 

 

Qol.Az-ın məlumatına görə, Ağdam təmsilçisi mübarizəyə II təsnifat mərhələsindən başlayacaq.

 

 

Aktivində 11.500 xal olan Qurban Qurbanovun komandası püşk zamanı "Seltik" (Şotlandiya), BATE (Belarus), "Ludoqorets" (Bolqarıstan), "Dinamo" (Zaqreb, Xorvatiya), "Maribor" (Sloveniya), "Makkabi" (Təl-Əviv, İsrail), "Partizan" (Serbiya), "Malmö" (İsveç), HİK (Finladniya), "Molde" (Norveç), "Videoton" (Macarıstan) və həmçinin Kipr və Danimarka çempionları ilə birgə səpələnmişlər səbətində yer alacaq.

Bu isə o deməkdir ki, Azərbaycan çempionu II təsnifat mərhələsində nisbətən zəif komandalarla qarşılaşacaq. "Qarabağ"ın 8 potensial rəqibi artıq bəllidir. Komandanın digər rəqibləri isə hələlik müəyyənləşməyib.

Birinci təsnifat mərhələsindəki 4 cütdən 3-ü "Qarabağ"la qarşılaşa bilər. Lakin Uels çempionu TNS-nin II təsnifat mərhələsində hansı səbətdə yer alacağı məlum deyil. Bu səbəbdən Uels təmsilçisinin növbəti mərhələdə "Qarabağ"a rəqib olub-olmayacağı sual altındadır. Ermənistan çempionu "Pünik"in isə II təsnifat mərhələsində "Qarabağ"a rəqib olmayacağı dəqiqdir.  

 

 

"Qarabağ"ın 8 potensial rəqibləri bunlardır: "Dila" (Gürcüstan), "Jalgiris" (Litva), "Astana" (Qazaxıstan), "Vardar" (Makedoniya), "Styarnan" (İslandiya), "Fola" (Lüksemburq), "Dandalk" (İrlandiya), "Hibernians" (Malta).

 

 

Qeyd edək ki, Çempionlar Liqasının II təsnifat mərhələsinin ilk oyunları 14-15 iyulda, cavab qarşılaşmaları isə 21-22 iyul tarixlərində keçiriləcək.


www.ann.az