"Bakı 2015"ə qatılan ölkələrin bayraqlarının qaldırılma mərasiminin vaxtı açıqlandı

Bu barədə "Report"a Azərbaycan nümayəndə heyətinin rəhbəri Könül Nurullayeva məlumat verib. 

Onun sözlərinə görə, təntənəli mərasim iyunun 11-də saat 18:00-da kəndin Bayraq Meydanında baş tutacaq. Nümayəndə heyətləri Atletlər Kəndinin meri Elçin Səfərov tərəfindən salamlandıqdan sonra bütün ölkələrin bayraqları qaldırılacaq. K.Nurullayeva bildirib ki, Olimpiya Oyunları ilə müqayisədə, Avropa Oyunlarında hər bir ölkə bayrağının ayrı-ayrılıqda deyil, eyni vaxtda dalğalandırılmasına qərar verilib. 

Qeyd edək ki, tədbirdə rəsmi şəxslərin, o cümlədən, Azərbaycanda akreditə olunmuş diplomatik korpus nümayəndələri və rəhbərlərinin iştirakı gözlənilir.