Tennis turnirində böyük sürpriz

ANS PRESS-in məlumatına görə, kişilərin mübarizəsində dünya sıralamasında 1-ci olan serbiyalı raketka ustası Novak Cokoviç xorvatiyalı Marin Kiliçlə qarşılaşıb. Serbiyalı idmançı rəqibinə 3:0 (6:4, 6:4, 6:4) hesabı ilə qalib gələrək, nüfuzlu turnirin 1/2 final mərhələsinə vəsiqə qazanıb. Bu uğur Cokoviç üçün ikiqat sevincə səbəb olub. Belə ki, o, kariyerasının 650-ci qələbəsini əldə edib.

Roland Qarros turnirinin son qalibi isveçrəli Stan Vavrinka fransız Riçard Qasquetlə üz-üzə gəlib. Hər kəs isveçrəli idmançının asan qələbə qazanacağını düşünsə də bu baş verməyib. 3 saat 28 dəqiqə davam edən gərgin mübarizədə fransalı raketka ustası 3:2 (6:4, 4:6, 3:6, 6:4, 11:9) hesabı ilə qələbə qazanıb.

Bu gün qadınların mübarizəsində isə turnirin finalçıları məlum olacaq. İlk 1/2 final cütündə ilk dəfə bu mərhələyə vəsiqə qazanan ispaniyalı Qarbine Muquruza, dünya reytinqində 13-cü pillədə qərarlaşmış polşalı Aqneşka Radvanskayala üz-üzə gələcək. 

Günün maraqla gözlənilən qarşılaşması isə "Vimbledon" turnirinin 5 qat qalibi, dünya tennisinin bir nömrəli raketka ustası olan amerikalı Serena Uilyamsla karyerinin ilk çempionluğunu 17 yaşında məhz "Vimbledon" turnirində əldə edən rusiyalı Mariya Şarapova arasında olacaq.

Avstraliya açıq, Roland Qarros və Amerika açıq tenis yarışlarından qayda-qanunlarına görə fərqlənən "Vimbledon" turnirinin mükfat fondu da "qrand-slam”lar içərisində ən yüksəkdir. Yaşıl kortda (tennis meydançası) oynanan və mübarizə aparan raketka ustaları yalnız ağ geyimdə iştirak edir. Turnirin bu mövsüm mükafat fondu 1,88 milyon fund sterlinqdi.