“Dinamo” ayağımızın altında qalmışdı” – Cavid Hüseynov

"Bütün oyun boyu üstün tərəf biz idik. "Dinamo” sanki ayağımızın altında qalmışdı. Onların sadəcə bir təhlükəli epizodu oldu”. 

Bu sözləri Qol.Az-a açıqlamasında "Qəbələ”nin kapitanı Cavid Hüseynov Avropa Liqasının I təsnifat mərhələsinin "Dinamo”  (Gürcüstan) ilə cavab matçından sonra deyib.

Qələbə qazanaraq növbəti mərhələyə yüksəldikləri oyundan  (2:0) danışan yarımmüdafiəçi rəqibdən hərtərəfli güclü olduqlarını bildirib:  

"Bu gün göstərdik ki, səfərdəki oyunda məğlub olmamalıydıq. Sadəcə, Tiflisdə bəxtimiz gətirmədi. Bu oyunda isə rəqib arxayınlaşmışdı. Biz bütün Azərbaycanın qarşısında sübut etdik ki, onlardan bir yox, üç qat güclüyük. Oynadığımız futbolla qələbəyə layiq idik”.

Tiflisdə baş verən məlum bayraq qalmaqalını da xatırladan təcrübəli oyunçu baş verənlərin "Qəbələ” futbolçularına ikiqat motivasıya verdiyini qeyd edib:

"Gürcülər ilk oyunda bizim bayrağımızı təhqir etdi. Bu, təbii ki, bizə pis təsir etmişdi. Məncə, qazandığımız qələbə onlara ən layiqli cavab oldu. Azarkeşlərə də təşəkkür edirəm. Bizə mötəşəm dəstək verdilər.  Bu, təkcə "Qəbələ”nin yox, bütün Azərbaycanın qələbəsidir”.