"Qarabağ" - "Seltik" biletləri bu həftə satışa çıxır

Futbol üzrə Çempionlar Liqasının üçüncü təsnifat mərhələsi çərçivəsində "Qarabağ" və Şotlandiyanın "Seltik" komandaları arasında baş tutacaq oyununun biletləri bu həftə satışa çıxır.

Bu barədə "Qarabağ" futbol klubunun mətbuat katibi Nurlan İbrahimov ANS PRESS-ə məlumat verib. Onun sözlərinə görə, həftənin bazar günü - yəni avqustun 2-si biletlər Tofiq Bəhramov adına Respublika stadionunun kassalarında satışa çıxarılacaq.

Biletlərin qiyməti sektorlardan asılı olaraq 1-10 azn arasında dəyişəcək. VİP sektorda matçı izləmək istəyənlər isə 50 azn-dən keçməli olacaq. Hər bir azarkeş maksimum 3 bilet ala bilər. "Qara bazar"ın qarşısını almaq üçün xüsusi mühafizə xidmətinin əməkdaşları da satış müddətində kassa qarşısında xidmət çəkəcəklər.

"Qarabağ" - "Seltik" matçı avqustun 5-i Tofiq Bəhramov adına Respublika stadionunda oynanılacaq. Qarşılaşmanın start fiti saat 21:30-da veriləcək. Bu komandalar arasında Şotlandiyada baş tutan qarşılaşmada "Seltik" 1:0 hesabı ilə qalib gəlmişdi.
www.ann.az