Ultimatumun vaxtı bitir

Bir qədər əvvəl Cənubi Koreyanın demilitariziya zonasının özünəməxsus hissəsində səsgücləndiricilər quraşdırması rəsmi Pxenyanın qəzəbinə səbəb olmuşdu. Şimali Koreya ordusu səsgücləndiricilər məhv etməyə çalışarkən tərəflər arasında silahlı qarşıdurmalar yaşanmışdı.

Şimali Koreya rəhbərliyi səsgücləndiricilərin hökumətə qarşı təbliğat-təşviqat aləti olduğunu əsas gətirərək qurğunun sökülməsini tələb edib. Hökumətin sözlərinə görə, əks təqdirdə bu təxribat xarakterli hərəkət iki ölkə arasında total müharibəyə səbəb ola bilər. Pxenyanın Birləşmiş Millətlər Təşkilatındakı səfiri An Men Hun belə deyib.

"Amerika Birləşmiş Ştatları və Cənubi Koreyanın Şimali Koreya xalqına qarşı siyasi və hərbi təxribatları səbəbilə hər iki ölkə müharibənin bir addımlığındadır. Koreya Xalq Demokratik Respublikasına qarşı aparılan psixoloji müharibə dövlətin və millətin ideologiyasını və bütün həyat tərzini dağıtmağa istiqamətlənib”.

Pxenyanın Seula verdiyi ultimatumun vaxtı bu gün başa çatacaq.

Cənubi Koreya prezidenti Pak Kın He də müharibə hədələrinə elə müharibə hədələri ilə də cavab verib. Prezident hərbi qüvvələri müharibəyə tam hazır olmağa çağırıb.

"Hərbi qüvvələr ehtimal edilən təxribatlara qarşı tam hazırlıqlı olmalıdırlar. Əgər belə bir şey olarsa, hərbi qüvvələrin dərhal qarşılıq verməsini istərdim. Ümid edirəm ki, hərbi qüvvələr vətəndaşların təhlükəsizliyini əsas götürəcəklər”.

Amerika hökuməti məsələ ilə əlaqədar şərhində Pxenyanı təxribat xarakterli hərəkətdən və hədələyici ritorikadan çəkinməyə çağırıb.

ABŞ müdafiə nazirinin Asiya və Sakit Okeanda təhlükəsizlik məsələləri üzrə köməkçisi Devid Şir: "Amerika hökuməti Şimali Koreyanın atəşkəs razılaşmasını pozmasına görə çox narahatdır. Vəziyyəti yaxından təqib edirik. Amerika öz tərəfdaşlarının müdafiəsi məsələsində dəyişməz mövqedədir. Pxenyan regionda sülh və stabilliyi pozan addımlar atmaqdan çəkinməlidir”

Cənubi Koreaynın paytaxtı Seulda Pxenyanın artilleriya zərbələrinə qarşı etiraz aksiyası keçirilib. Aksiya zamanı fəallar Şimali Koreya prezidenti Kim Çen Inın şəklini yandırıblar.//Anspress