Bəşər Əsədin başına mükafat qoydular

Suriyada fəaliyyət göstərən "Əl-Qaidə” ilə əlaqəli "Əl Nusra” təşkilatı dövlət başçısı Bəşər Əsəd və "Hizbullah”ın lideri Hasan Nasrallahın başına pul mükafatı qoyub. Modern.az xarici mediaya istinadən bildirir ki, təşkilat ayrıca Rusiyanın hava əməliyyatlarına qarşı Suriyadakı Nusayri məskunlaşmalarına hücum çağırışı edib.

Məlumatda qeyd edilir ki, Youtube üzərindən bir açıqlama yayan "Əl Nusra”nın lideri Əbu Məhəmməd Əl Culani Suriyanın dövlət başçısı Əsədi öldürən adama 3 milyon avro mükafat verəcəklərini bildirib. Culani Suriya ordusu ilə birlikdə əməliyyat keçirən Livanın "Hizbullah” təşkilatının lideri Nasrallahın öldürülməsi üçünsə 2 milyon avro ödəyəcəklərini söyləyib.

Culani bu şəxsləri öldürən adamı və ailəsini mühafizə ilə təmin edəcəklərini də bildirib. Rusiyanın Suriyada başlatdığı hava əməliyyatlarını "Əsəd rəhbərliyinin çöküşünü önləmək üçün bir hücum” olaraq xarakterizə edən "Əl Nusra” lideri, intiqam olaraq Əsəd ailəsinin də mənsubu olduğu Nusayrilerin yaşadığı bölgələrdə vəziyyəti gərginləşdirmək çağırışını edib.