Azərbaycanlı siyasətçi Türkiyədə liderliyə iddialıdır

"Elə bir MHP quracağıq ki, həm ənənəni görəcəksiniz, həm də gələcəyi görəcəksiniz."

Türkiyədə bu ilin avqust ayında mənsubu olduğu Milliyyətçi Hərəkat Partiyasından (MHP) çıxarılan və məhkəmə qərarı ilə üzvlüyü bərpa olunan Azərbaycan əslli siyasətçi Sinan Oğan bu partiyanın lideri olmağa iddialıdır. Bu barədə Sinan Oğan sosial şəbəkədəki səhifəsində yazıb. 

Ən geci 21 mart Novruz bayramı günü MHP-də qurultay keçirilməsini tələb edən Oğan "Twitter”dəki mesajlarını "#OAnGəlir” haştaqı ilə paylaşıb. 

"Ən geci 21 mart, Novruz bayramında, partiyamızı mənim sədrliyimlə yeni rəhbərliyə qovuşduracağıq. Elə bir MHP quracağıq ki, həm ənənəni görəcəksiniz, həm də gələcəyi görəcəksiniz. Bizim şüarımız: "Bu gün qurultay, sabah iqtidar”. Biz saraya, hakimiyyəti təhvil götürməyə gedəcəyik. Lider külək əsdirəcək ki, aşağıda fırtına qopsun. Bizim təşkilatımız ən çox fədakarlıq edən təşkilatdır. Mən bir yorğunluq görürəm, bir yorulmuşluq görürəm...” – deyə tanınmış siyasətçi sosial şəbəkə mesajında bildirib. 

Azərbaycan əslli siyasətçi Sinan Oğan 24-cü çağırış parlament seçkisində İqdır şəhərindən millət vəkili seçilmiş, partiya rəhbərliyinə qarşı kəskin çıxışları səbəbindən MHP intizam komissiyası onun partiyadan çıxarılmasına qərar vermişdi. Bundan sonra məhkəməyə müraciət edən Sinan Oğan MHP üzvlüyünü bərpa edib. 

Sinan Oğandan başqa MHP rəhbərliyini kəskin tənqid edən Meral Akşener də bu partiyanın sədri olmağa iddialıdır. Bəzi bozqurdlar arasında qadının lider ola bilməyəcəyinə dair fikirlər olsa da partiyanın daxili nizamnaməsində Akşenerin qurultayda sədrliyə namizəd olmasının qarşısını alacaq heç bir maneə yoxdur. Meral Akşener sosial şəbəkədə yazdığı mesajda, noyabrın 30-da keçirəcəyi mətbuat konfransında namizədliyi barədə yekun qərarını açıqlayacağını bildirib. 

MHP-nin hazırki sədri Dövlət Baxçalı isə mətbuata verdiyi açıqlamada qurultayın ən tez 2018-ci il martın 18-də olacaını deyib. (anspress)