Türkmənistanda siqaret satışı qadağan olundu

"Report" xəbər verir ki, bu barədə yerli "Türkmənistan xronikası" nəşri yazıb.

Məlumata görə, paytaxt Aşqabadda sağlam cəmiyyətin mühafizəsi üzrə xidmətin əməkdaşları satış obyektlərində yoxlama aparıblar və sahibkarları tütün məmulatları satışına görə on minimal əmək haqqı qismində (1700 dollar) cərimə ediləcəkləri ilə hədələyiblər.

Nəşr yazır ki, bundan sonra satıcılar siqareti gizli və yalnız tanışlarına satmağa başlayıblar. Bununla belə siqaretin qiyməti 1,5–2 dəfə artıb.

Yanvarın 5-də hökumətin iclası zamanı prezident Qurbanqulı Berdiməhəmmədov sağlam cəmiyyətin təhlükəsizliyi mühafizəsi xidmətinin işini tənqid edib və siqaret çəkməklə sərt mübarizə aparmağa çağırıb.