Şəxsi mesajları oxuyan süni intellekt sistemi istifadəyə verilib

Məsələn, istifadəçi öz səhifəsində qabyuyan maşının satışı barədə elan yerləşdirmək istəsə, "Deeptext” süni intellekt sistemi məhsulların satışı üçün nəzərdə tutulmuş xüsusi yazı tipi yaratmağı təklif edəcək.

"ICTnews” Elektron Xəbər Xidməti "cnews.ru” saytına istinadən yazır ki, "Deeptext” sistemi həm də "Messenger” proqramında mesaj mübadiləsi üçün daha geniş imkanlar təklif edəcək. Məsələn, əgər istifadəçi səfər etmək zərurəti haqqında yazsa, sözügedən süni intellekt sistemi bu məlumatı "Facebook”un botuna ötürəcək və sonuncu istifadəçiyə taksi çağırmağı təklif edəcək.

"Deeptext” süni intellektinin əsas vəzifələrindən biri kontentin fərdiləşdirilməsidir. "Facebook” kompüter təlimindən istifadə etməklə  istifadəçilərin maraq dairəsini daha yaxşı anlamaq və onlara müvafiq kontent təklif etmək niyyətindədir.

Digər bir mühüm məsələ istifadəçiləri sosial şəbəkənin digər iştirakçılarının təhqir və aqressiv davranışından müdafiə etməkdir. "Deeptext” yalnız mətn mesajlarında deyil, həm də şəkillərdə aqressiyanı ayırd edə bilir.

Süni intellekt sistemi saniyədə 20 dildə bir neçə min yazını təhlil edə bilər. Məlumat üçün bildirək ki, hər saniyə "Facebook” sosial şəbəkəsində təxminən 6700 yazı və 2100 şərh generasiya edilir.

Lakin yazışmaların robot tərəfindən oxunulması istifadəçilərin narazılığına səbəb ola bilər.

2016-cı ilin mayında mesajların tərkibinin oxunulması və sosial şəbəkə istifadəçilərinin bir-birləri ilə mübadilə etdikləri istinadların skan edilməsinə görə "Facebook” şirkətinə qarşı kollektiv iddia qaldırılıb.

Xatırladaq ki, Mark Zukerberqin şirkəti süni intellektin öyrənilməsi üzrə bir neçə laboratoriya inşa edib. Üçüncü belə laboratoriya 2015-ci ilin iyununda Parisdə açılıb.