Gürcüstanda NATO PA-nın yaz sessiyası başlayıb

 

APA-nın "apsny.ge” saytına istinadən verdiyi xəbərə görə, sessiyada 28 üzv ölkədən, eləcə də tərəfdaş ölkələrdən 600-dən çox nümayəndə iştirak edir.   

 

Sessiyanın ilk günündə iştirakçıların birgə mətbuat konfransının, Gürcüstan-NATO Parlamentlərarası Şurasının, eləcə də Daimi Komitənin qapalı yığıncağının, bir sıra ikitərəfli və çoxtərəfli görüşlərin keçirilməsi nəzərdə tutulub.

 

İkinci-üçüncü günlər NATO PA-nın müxtəlif komitələrinin toplantıları olacaq. Komitə toplantıları və plenar iclasda NATO-Avropa İttifaqı əməkdaşlığı, terrorçuluqla mübarizə, Əfqanıstanda vəziyyət, Qara dənizdə təhlükəsizlik məsələləri və digər mövzular müzakirə ediləcək. Gürcüstanın müdafiə naziri Levan İzoria, Silahlı Qüvvələrin Baş Qərargah rəisi Vladimir Çaçibaya, xarici işlər naziri Mixail Canelidze, sabiq xarici işlər naziri İrakli Menaqarişvili, vətəndaş bərabərliyi və barışıq naziri Ketevan Tsixelaşvili və digər şəxslərin məruzə ilə çıxış etməsi nəzərdə tutulub.

 

Plenar sessiya mayın 29-da keçiriləcək. Gürcüstan parlamentinin sədri İrakli Kobaxidze, baş nazir Georgi Kvirikaşvili, prezident Georgi Marqvelaşvili və xüsusi qonaq qismində dəvət olunan NATO baş katibinin müavini Rouz Getemüller ilə Ukrayna Ali Radasının sədri Andrey Parubiy iştirakçılara müraciət edəcək. Sonda Gürcüstanın avroatlantik inteqrasiyasına dəstək ifadə olunan bəyannamənin qəbulu nəzərdə tutulub.

 

Qeyd edək ki, sessiyada Ziyafət Əsgərovun rəhbərliyi ilə Azərbaycan nümayəndə heyəti də iştirak edir.