Bərzanidən geriyə addım

İraq Kürdüstanının başçısı Məsud Bərzani Bağdadın regiona qarşı tətbiq etdiyi sanksiyaları geri götürəcəyi təqdirdə, kürd muxtariyyətinin müstəqilliyi haqqında referendumun nəticələrini dondurmağa hazır olduğunu deyib.

Anews.az "Əl-Ərəbiyyə" telekanalına istinadən xəbər verir ki, bu barədə bu gün kürd lideri ilə danışıqların nəticələri barədə danışarkən İraqın vitse-prezidenti Üsamə ən-Nüceyfi bildirib.

Ən-Nüceyfinin sözlərinə görə, Bərzani İraq hakimiyyəti ilə dialoqa hazırdır.

Bərzani İraqın vitse-prezidentləri Üsamə ən-Nüceyfi və Ayad Alaui ilə danışıqlar aparıb.

Həmin danışıqlarda Bağdadla Ərbil arasında yaranmış böhran vəziyyətindən çıxış üçün yollar axtarılıb.

Bununla belə, İraqın baş naziri ofisinin rəsmi nümayəndəsi Saad əl-Hədisi qeyd edib ki, vitse-prezidentlərin təşəbbüsü Bağdadın rəsmi mövqeyini əks etdirmir və görüşlər mərkəzi hakimiyyətlə razılaşdırılmayıb.
www.anews.az