Saakaşvili Sərkisyanı “barıqa” adlandırdı

Kult.az xəbər verir ki, kitabın təqdimatının keçirilməsinə izn verilməyən Yeqişe Çarentsa ev muzeyindən sonra "Noyan Tapan” kitab mağazası da təqdimata ev sahibliyi etməkdən imtina edib. Kitabın tərcüməçisi Mikayıl Naapetyan öz Feysbuk səhifəsində tədbirdən imtinanı siyasi təzyiq və açıq senzura adlandırıb.

Feysbukda, həmçinin, Saakaşvilinin kitabının təqdim edilməməsini tələb edənlər də az olmayıb. Onlar isə daha çox Saakaşvilini Cavaxetiyada erməniləri həbs etdirməkdə, Azərbaycan və Türkiyə ilə yaxın əlaqələrdə ittiham ediblər. Ermənistan Təbiətin Mühafizəsi nazirinin köməkçisi Mesrop Yesayan isə öz Fesybuk səhifəsində daha kəskin mövqe ortaya qoyub:

"Saakaşvili Gürcüstandakı erməni ictimai xadimlərini və erməni dilini sıxışdırdığına, eləcə də Türkiyə və Azərbaycanla sıx əməkdaşlıq etdiyinə görəmi öz kitabının erməni versiyasının təqdimatına layiq görülüb?”

Gürcüstandakı Saakaşvili tərəfdarları Ermənistanda kitabın təqdimatına izn verilməməsini tənqid edib. Tiflis Universitetinin professoru, politoloq Oleq Panfilov kitabın təqdimatının Ermənistan hökuməti tərəfindən qadağan olunduğunu deyib. Saakaşvilinin özü isə qadağaya kinayəli formada cavab verib:

"Bütün ölkələrin "barıqa”ları (satılmışları) mənə qarşı birləşib. Təəssüf ki, Ermənistanda da müdaxiləsiz baş tutmadı. Maraqlıdır ki, Gürcüstandakı rəqiblərim şayiə yayıblar ki, mən etnik erməniyəm, Ermənistandakılar isə anti-erməni olduğumu deyirlər”.

Qeyd edək ki, Saakaşvili öz kitabında əsasən 2003-cü ildəki qızılgül inqilabından, keçirdiyi reformlardan bəhs edir. O, həmçinin, Rusiya-Gürcüstan müharibəsinin bir sıra epizodlarını, eləcə də Vladimir Putinlə arasındakı əlaqələri, Ukraynadakı böhranı qələmə alıb.