Astana AB-ni Orta Asiyaya çağırdı

Axar.az xəbər verir ki, bunu AB ilə Mərkəzi Asiya arasındakı münasibətlərin 25 illiyi ilə bağlı keçirilən konfransda çıxışı zamanı Qazaxıstan Xarici İşlər naziri Kayrat Əbdürrəhmanov söyləyib.

"Qazaxıstan AB-nin Mərkəzi Asiya strategiyasının yenilənməsini dəstəkləyir. Biz onun aktuallaşdırılması ilə bağlı konkret təkliflərlə çıxış etməyə hazırıq. Bu proqramın gələn ilin ortalarına hazırlanması nəzərdə tutulub. Burada gələcək əməkdaşlığın əsas prioritetləri cəmləşəcək. Avropa Birliyinə Mərkəzi Asiyaya Avropa kapitalının cəlbi üçün mexanizmlər hazırlanmasını təklif edirik. Bu, Avropa şirkətlərinin regional bazarlara çıxışı üçün yeni imkanlar yaradacaq və onun mövqelərini regionda gücləndirəcək”, – deyə o bildirib.

Qeyd edək ki, hazırda Mərkəzi Asiya siyasi və iqtisadi baxımdan daha çox Çin və Rusiyanın təsiri altındadır. Moskvanın bölgə ölkələrinin demək olar ki, əksəriyyəti üzərində mütləq hakimiyyəti mövcuddur. Mərkəzi Asiyadakı 2 dövlət Avrasiya İttifaqına üzvdür. Digər üç dövlət isə Moskvanın əsas lokomotiv rolunu oynadığı Kollektiv Təhlükəsizlik Müqaviləsi Təşkilatına üzvdür.

İslam Kərimovun ölümündən sonra Rusiya Özbəkistanda mövcud olan təsir gücünü daha da artırıb.