Paşinyan oğlunun başı ilə risk edir

Bunu Oxu.Az-ın müxbiri ilə söhbətində "Baku Network” ekspert şurasının rəhbəri, fəlsəfə elmləri doktoru, Elxan Ələsgərov Ermənistan baş naziri Nikol Paşinyanın öz oğlunu Azərbaycanın işğal altında olan Dağlıq Qarabağ bölgəsinə əsgərliyə göndərməsi ilə bağlı şərhində bildirib.

Onun sözlərinə görə, öz bəyanatları ilə Paşinyan Dağlıq Qarabağ probleminin həlli yollunda çoxsaylı maneələr qurur.

"Onun oğlu haqqında bəyanatı bu qəbildən olan növbəti çıxışıdır. Sözsüz ki, bu populizmdir.  Başlıca məqsəd, narazı qarabağlılara, oğlunun onları qoruyacağını göstərməkdir. Həmçinin Qarabağ müharibəsində oğullarını itirmiş anaları susdurmaq istəyir. Yəni deyir ki, baxın mənim oğlum da oradadır”, - deyə Ələsgərov bildirib.

Ekspertin fikrinə görə, bu addım həmçinin Ermənistandan olan böyük hərbi çağırışçı kütləsinin narazılığının qarşısını almağa hesablanıb. O, çağırışçılar ki, hər an sadəcə öz mövqeyini tərk edib, Ermənistana qayıda bilər.

"Ona da, Sarkisyan kimi qırğına göndərməyə əsgər lazımdır. Bu bir növ digər fərarilərə çağırışdır. Demək istəyir baxın, sosial-iqtisadi problemlərə görə ölkədən qaçmış gənc ermənilər Ermənistana qayıdıb və xidmət çəkir”,- deyə ekspert vurğulayıb.

Ancaq bu bəyanat əvvəlkilər kimi siyasi dəlikdir.

"Birincisi, Qarabağa Ermənistan ordusu dislokasiya olunub, ikincisi oğlunu Qarabağa göndərmiş liderlə hansı danışıqlardan söhbət gedə bilər?! Həmsədrlər Paşinyanı bu bəyanatına görə qınamalıdırlar. XİN-nin bununla bağlı bəyanatı yerli-yerində və düzgün oldu.  Paşinyan öz davranışı ilə danışıqlar prosesi perspektivini "torpeda ilə vurur”. Halbuki, bu Rusiyanın mövqeyinə və Parislə Vaşinqtonun bəyanatlarına ziddir”, - deyə saytın həmsöhbəti bildirib.

Qeyd edək ki, bundan əvvəl Azərbaycanın XİN-i Ermənistan vətəndaşlarının başqa dövlətin ərazisində yəni Azərbaycan Respublikasının işğal altında olan torpaqlarında hərbi xidmət keçməsinin beynəlxalq hüquq normaları və prinsiplərinin hətta Ermənistan qanunlarının kobud pozuntusu olduğunu bildirib.