Ərdoğan ciddi rəqabət görür: Akşənər kölgədə qaldı...

Bu sözləri Axar.az-a açıqlamasında QAFSAM-ın sədr müavini, siyasi elmlər üzrə fəlsəfə doktoru Nazim Cəfərsoy Türkiyədə keçiriləcək seçkiləri şərh edərkən deyib. O bildirib ki, seçki ilə bağlı zaman-zaman anket sorğularının nəticələri yayımlanır:

"Ancaq hələ də seçkinin nəticələri ilə bağlı qeyri-müəyyənlik davam edir. Çünki Türkiyə tarixinin ən əhəmiyyətli və sürprizlərə hazır olan seçkisi məhz 24 iyunda olacaq. Bu mənada keçirilən sorğuların nəticələri də o qədər dəqiq deyil. Müxtəlif şirkətlərin keçirdiyi sorğularda seçkinin birinci turda Ərdoğanın qələbəsi ilə nəticələnəcəyini deyənlərlə bərabər, seçkinin taleyinin 2-ci turda həll olunacağını bildirənlər də var. Hələ seçkinin nəticələri ilə bağlı dəqiq proqnoz vermək mümkün deyil. Seçkinin keçirilməsinə 1 həftədən az müddət qalmasına baxmayaraq, seçkinin taleyini dəyişdirə biləcək müəyyən addımlar atıla bilər. Qəndildəki proseslər, Yunanıstanla bağlı məqamlar, yeni bir gərginliklərin yaranma ehtimalı və s”.

Ekspert vurğulayıb ki, seçkiyə namizədlər müəyyənləşdirildiyi ilk dönəmlərdə Maral Akşənər daha üstün mövqelərə sahib idi:

"Amma CHP-dən Məhərrəm İncənin namizədliyinin irəli sürülməsi Akşənəri kölgədə qoydu. Məhərrəm İncənin ikinci tura qalma ehtimalını səsləndirənlər daha çoxdur. Bunu 3 məqamla əlaqələndirirlər. Birinci, Məhərrəm İncə oturuşmuş bir partiyanın namizədidir və seçki kampaniyasına başlarkən artıq o, təxminən 20% səs bazasına sahib idi. İkincisi, Məhərrəm İncə özü çox uğurlu seçki kampaniyası həyata keçirir və performans göstərir. Bir başqa əhəmiyyətli məqam iqtidarın Maral Akşənərin ikinci tura qalmasını əngəlləyəcək yanaşma strategiyası qurmasıdır. Seçki kampaniyasının başından etibarən iqtidar cəbhəsində Maral Akşənərin adı çəkilmir. Yəni Ərdoğan həm Akşənərin partiyasına, həm də özünə qarşı "görməzdən gəlmə”, "görməmə” strategiyasını tətbiq edir”.

Ekspertin sözlərinə görə, Maral Akşənər seçki ikinci tura qalsa, əhəmiyyətli namizəd olacaq:

"Akşənər sağ cinahdan CHP-dən, MHP-dən, AKP-dən daha çox səs alarsa, bu, seçkinin ikinci tura qalmasına səbəb ola bilər. Yəni Akşənər Ərdoğanın seçkinin ilk turunda qələbə qazanmasına mane olacaq namizəddir. İkinci turda Akşənərin rəqibi Ərdoğan olarsa, ona qarşı üstünlük qurmaq ehtimalı zəif də olsa, var. Amma bunlar hamısı ehtimaldır”.

Ekspert bildirib ki, seçkinin ikinci tura qalma ehtimalını gücləndirən məqamlar çoxdur:

"İlk növbədə seçkinin tərəflərindən biri 16 ildir hakimiyyətdə olan iqtidar partiyasıdır. 16 il hakimiyyətdə olmağın yaratdığı ciddi mənfi çalarlar var: həm siyasi, həm iqtisadi, həm də mədəni sferada. Bu mənfi çalarlar iqtidara seçkinin ilk turunda qələbə çalmasına mane olur. Eyni zamanda 2014-cü il seçkiləri və 2016-cı il referendumunun nəticələri seçkinin birinci turda nəticələnməsi ehtimalını azaldır. Çünki həm rəqiblər çox müxtəlifdir, həm iqtidarın siyasi-iqtisadi vəziyyəti son iki illə müqayisədə daha pisdir. Dolayısı ilə bunlar seçkinin ikinci tura qalma ehtimalını artıran məqamlardandır”.

Qeyd edək ki, Türkiyədə 24 iyunda növbədənkənar prezident və parlament seçkiləri keçiriləcək.