Trampın ordu ilə bağlı dünyaya mesajı

 

AzVision.az bildirir ki, bu barədə Tramp Qərbi Virciniua ştatında ABŞ-ın müstəqillik günü ərəfəsində Silahlı Qüvvələrə həsr olunan təmtəraqlı tədbirdə deyib. 

 

Mərasimdəki çıxışında Tramp qeyd edib ki, hazırda ABŞ özünün əzəmətli silahlı qüvvələrini və ölkənin təhlükəsizliyini bərpa edir. ABŞ-ın müdafiə büdcəsi çərçivəsində 700 milyard dollarlıq rekord xərclərə diqqət çəkən Tramp ölkəsinin modernləşdirilmiş silahlı qüvvələrinin çox güclü olduğunu və onlardan heç vaxt istifadə olunmayacağına ümid etdiyini vurğulayıb. 

Qeyd edək ki, 2019-cu maliyyə ili üzrə büdcə layihəsində Pentaqona (ABŞ Müdafiə Nazirliyi) ayrılacaq ümumi məbləğ Trampın istəyinə uyğun olaraq, 716 milyard dollar təşkil edir. Bu məbləğin 99 milyard dolları ABŞ-ın ölkə hüdudlarından kənardakı hərbi əməliyyatlarının maliyyələşməsinə xərclənəcək. Həmçinin, qanun layihəsində ABŞ hərbi qulluqçularının sayının daha 16 min nəfər, onların əmək haqlarının isə 2,6% artırılması nəzərdə tutulub. Bundan başqa, hərbi hava qüvvələrinin yenilənməsi üçün 40 milyard dollar sərf olunacaq. 

ABŞ-ın yeni nüvə başlıqlarının hazırlanmasına 65 milyon dollar maliyyə ayrılması isə Konqressdə qızğın müzakirələrə səbəb olmuşdu. Demokratlar buna qarşı çıxaraq, həmin bəndin ləğvini təklif ediblər. Lakin Respublikaçılar partiyasının üzvləri onların təklifini rədd edərək, yeni nüvə başlıqlarının Rusiyanın qarşısını almaqda vacib olduğunu bildirmişdilər. ABŞ Konqressinin büdcəyə nəzarət idarəsinin hesablamalarına görə, 30 il (2017-2046) ərzində ABŞ taktiki nüvə qüvvələrinin modernləşdirilməsi üçün Vaşinqton ümumilikdə 25 milyard dollar ayırmağı planlaşdırır.