Devid Kemeron: Dünya iqtisadiyyatı yeni maliyyə böhranı astanasındadır

Böyük Britaniyanın Baş naziri Devid Kemeron Brisbendə keçirilən G20 sammitinin nəticələri ilə bağlı məqaləsində dünya iqtisadiyyatının yeni qlobal maliyyə böhranı astanasında olduğu barədə xəbərdarlıq edib.

ANN.Az AzərTAc-a istinadən xəbər verir ki,  The Guardian qəzetində göstərilir ki, Britaniya hökumətinin başçısı altı il bundan əvvəl dünyanı diz üstə çökdürən maliyyə böhranından sonra, dünya iqtisadiyyatını yenidən təhlükə gözlədiyini bildirib.“Böyük iyirmilik” sammiti zamanı dünya liderləri ilə görüşündə iqtisadi problemlərin aydın göründüyünü deyən D.Kemeron Avrozonanın yüksək işsizlik, iqtisadi artım tempinin azalması və qiymətlərin real ucuzlaşması ilə səciyyəvi olan tənəzzülün mümkün üçüncü dalğası astanasında dayandığını, böhrandan sonrakı ilk mərhələdə iqtisadi artımının lokomotivi olan bazarların inkişaf dinamikasının zəiflədiyini vurğulayıb. Dünya iqtisadiyyatını təhdid etməkdə olan digər təhlükələr sırasına dünya ticarətinin liberallaşdırılması istiqamətində danışıqlarda yaranan durğunluğu, Ebola virusu ilə bağlı epidemiyanı və Yaxın Şərqdəki münaqişə ocaqlarını da əlavə edən Baş nazir Britaniyadakı iqtisadi artımın hökumətin doğru yolda olduğunu, lakin qlobal təsərrüfatda artan neqativ tendensiyaların onun ölkəsinin iqtisadiyyatına da təsir göstərə biləcəyini qeyd edib.ANN.Az