Türkiyə və Rusiya Fəratın şərqi üçün razılaşdı

Ötən həftəsonu Rusiyanın paytaxtı Moskvada keçirilən zirvədə Türkiyə və Rusiya Suriyada Fəratın şərqində keçirilməsi planlaşdırılan əməliyyat üçün razılığa gəldi.

Anews.az publika.az-a istinadla xəbər verir ki, bu haqda diplomatik mənbələr bildirib.

Mənbəyə görə, Türkiyənin narahatlıqlarını qəbul edən Rusiya Bəşər Əsəd güclərinə "Münbiçə girmə" xəbərdarlığı edib. Xatırladaq ki, dekabrın 29-da keçirilən zirvə görüşü 1,5 saat davam edib. Türkiyənin xarici işlər naziri Mövlud Çavuşoğlu, müdafiə naziri Hulusi Akar və Türkiyə Milli İstihbarat Təşkilatının (MİT) başçısı Hakan Fidanla rusiyalı həmkarların görüşündə Suriyadakı proseslər müzakirə edilib.

Zirvə görüşündən sonra açıqlama verən Türkiyənin xarici işlər naziri Mövlud Çavuşoğlu Suriya torpaqlarının terror təşkilatlarından təmizlənməsində ortaq iradənin olduğunu bildirib. "Rusiya və İranla Suriya və bölgə məsələləri ilə yaxından əməkdaşlıq etməyə davam edəcəyik", - o deyib. Rusiyanın xarici işlər naziri Sergey Lavrov isə terrorizm təhlükəsinin aradan qaldırılması üçün Suriyadakı birliklərin koordinasiyası mövzusunda razılaşdıqlarını söyləyib.