Çin Ayın qaranlıq səthinə endi

Çinin "Chang’e 4” adlı pilotsuz kosmik gəmisi Ayın cənub qütbündəki Aitken hövzəsini incələmək üçün qaranlıq səthi kimi tanınan bölgəyə enib.

"Ölkə.Az” xəbər verir ki, Ay səthindəki ən böyük, ən qədim və ən dərin krater olan Aitken hövzəsi haqqında elə də çox məlumat yoxdur.

Bu günə qədər kosmik gəmilər Ayın qaranlıq üzünün fotolarını çəkib. Amma heç bir kosmik aparat bölgəyə eniş etməyib. İlk addımı isə Rusiya və ABŞ-la bu sahədə rəqabət aparan Çin atıb.

"Chang’e 4” Ayın səthi ilə bağlı geniş araşdırma aparacaq və minerallar haqqında məlumat toplayacaq. Aitken krateri Ayın yaranmasından qısa müddət sonra böyük çarpışma nəticəsində meydana gəlib və toqquşma peykin mərkəzindəki bəzi maddələrin səthə çıxmasına səbəb olub.

Əgər missiya uğurla başa çatsa, Ayın yaranmasına aid yeni məlumatlar əldə edilə bilər.