Ruslar Krım-Tatar Məclisinə silahlı basqın etdi

Rusiya Federasiyası Təhlükəsizlik Xidmətinin (FSB) əməkdaşları və silahlı adamlar Krım-Tatar Milli Məclis binasına basqın edib.

ANN.Az xəbər verir ki, üzləri maskalı və əlləri silahlı adamlar məclis binasını mühasirəyə alıb, ətrafdakı adamları uzaqlaşdırıb. Binada axtarış aparıldığı deyilir. Eyni zamanda binanın qarşısında həbsxana maşınının dayandığı bildirilir.

Sabah saatlarında Milli Məclisin üzvü İsgəndər Bariyevin evində də axtarış aparılıb, onun kitabları, komputeri müsadirə edilib. Krımın müstəqilliyinin tanınması ilə bağlı referenduma qatılmayan, Rusiyaya ilhaq anlaşmasını tanımayan Krım-Tatar Milli Məclisi bazar günü keçirilən yerli seçkilərə də qatılmadığını elan etmişdi.

ANN.Az