ABŞ İdlibi vurdu, Rusiya sərt mövqe göstərdi

Vaşinqton bütün razılaşmaları pozub və Moskva ilə Ankaranı xəbərdar etmədən İdlib vilayətinin Maarat-Misrin və Kafer-Xaya yaşayış məntəqələrinə aviazərbələr endirib.
Virtualaz.org bildirir ki, bu məlumatı Rusiyanın Düşmən Tərəflərin Barışdırılması Mərkəzi yayıb.
"ABŞ öz fəaliyyətləri ilə İdlibdə deeskalasiya zonasında atəşkəs rejimini təhdid altında qoyub. Amerikanın zərbəsi ucbatından yaranan atışmalara rəğmən Suriya ordusu hərbi fəaliyyətlərin tətbiqində moratoriumunu qoruyub saxlayır”, – deyə Mərkəzdən bildirilib.
Rusiya Müdafiə Nazirliyinin məlumatında isə qeyd olunur ki, Moskva və Ankaranın təşəbbüsü ilə 31 avqust səhər saat 6.00-dan Suriya ordusu İdlib atəşkəs zonasında birtərəfli atəşkəs elan edib, bu barədə bütün münaqişə tərəfləri məlumatlandırılıb. Atəşkəsin mülki şəxslərin humanitar dəhlizə İdlibi tərk etməsinə imkan yaradacağı ehtimal edilirdi.
Məlumatda həmçinin qeyd olunur ki, sutka ərzində Rusiya və Suriya döyüş təyyarələri İdlib üzərində uçuşları dayandırıb: "Ancaq 31 avqust saat 15.00-da ABŞ-ın yaşayış məntəqələrinə zərbə endirməsi nəticəsində çoxsaylı tələfat və dağıntılar olub. ABŞ tərəfi Əl-Qaidə terror təşkilatının idarəetmə məntəqəsinin məhv edildiyini bəyan edib. Vaşinqton bu addımı ilə İdlibdə atəşkəsin qorunmasını təhlükə altında qoyub, atəşkəsi pozub”.

www.anews.az