Putin Ukraynaya ordu yeritmək istəyinin səbəbini açıqladı

Rusiya prezidenti Vladimir Putin Federasiya Şurasından Ukraynaya ordu yeritməyə icazə verməsi üçün xahişinin Krım ətrafındakı hadisələrlə bağlı olduğunu bildirib.

APA-nın “RİA Novosti”yə istinadən verdiyi xəbərə görə, bunu Putin Vyanada mətbuat konfransında bildirib.   

“Mən Federasiya Şurasında belə bir məktub təqdim etmişdim. Mənim belə bir qərar verilməsinə dair xahişim Krımda o zaman baş verən hadisələrlə bağlı olub. Mən o zaman Silahlı Qüvvələrin istifadə olunmasını istisna etmirdim”, deyə Putin bildirib.

“Allaha şükürlər olsun ki, Silahlı Qüvvələrdən istifadə olunmadı. Biz hətta Rusiya Silahlı Qüvvələrin Krımda beynəlxalq müqavilə ilə nəzərdə tutulmuş sayını belə artırmadıq”, deyə Rusiya prezidenti qeyd edib.  

Putin əlavə edib ki, Rusiya Krımda keçirilmiş referendum zamanı əhalinin seçim azadlığının təmin olunması üçün ordu qüvvələrindən istifadə edib. “Biz bunu Ukrayna ordusunun əhalinin seçim prosesinə mane olmasının qarşısını almaq üçün etmişdik”, deyə o bildirib.   

Martın 1-də Rusiya Federasiya Şurası Putinin  ordunun Ukraynaya mümkün yeridilməsinə dair təklifini yekdilliklə dəstəkləyib.  

İyunun 24-də Putin Federasiya Şurasına Ukrayna ərazisinə ordu yeritməyə dair icazəni ləğv etməyi təklif edib.    

Federasiya Şurasının bu gün bu məsələyə dair qərar verəcəyi gözlənilir. 

ANN.Az