Ermənistanın keçmiş baş naziri: Müharibədə 5 mindən çox itki Ginnesin rekordudur

"Hər kəsə aydındır ki, Ermənistan indi uçuruma yuvarladılmaqda davam edir”.

Anews.az Ermənistan mətbuatına istinadən xəbər verir ki, bunu ölkənin sabiq baş naziri, "Vətənin qurtuluşu üzrə Hərəkat"ın namizədi Vazgen Manukyan deyib.

"Bu (İkinci Qarabağ müharibəsində -red) müharibədə 5 mindən çox əsgər itirdik. Bu, yəqin ki Ginnesin rekordu hesab edilə bilər ki, 44 gün ərzində 2,5 milyonluq xalq belə itkilərə malik olsun", - Manukyan qeyd edib.

Müxalif siyasətçi vurğulayıb ki, baş verənlərdən sonra Ermənistanda heç kim bu müharibə və onun dağıdıcı nəticələrinə görə məsuliyyətə cəlb edilməyib: "Bundan başqa, baş nazir elə xoruzlanır, sanki günahkar o deyil, kimsə başqasıdır”.

Manukyanın sözlərinə görə, Ermənistanın itkiləri təkcə müharibə ilə kifayətlənməyib. Ölkənin məhkəmə sistemi, təhsil sahəsi hücumlara məruz qalır. Atom Elektrik Stansiyasının bağlanılacağı deyilir.