Beş ayda Ermənistandan 25 ildə gedənlərin sayı üzrə rekord göstərici qeydə alınıb

Cari il Ermənistanda miqrasiya artımının görünməmiş göstəricisi qeydə alınıb – 2021-ci ilin 5 ayı ərzində ölkədən gedənlərlə gələnlərin sayı arasında fərq 88 854 nəfər təşkil edib.

"Report” Ermənistan mediasına istinadən xəbər verir ki, bu barədə İctimai Şuranın Miqrasiya məsələləri üzrə Komissiyasının sədri, miqrasiya məsələləri üzrə ekspert Qaqik Yeqanyan bildirib.

"Səbəblərin müəyyənləşdirilməsi üçün ətraflı tədqiqat aparmaq lazımdır. Amma görünür, miqrasiya əhval-ruhiyyəsi geniş artıb. Bizdə azı 25 il ərzində analoji mənzərə olmayıb", - o deyib.

Beləliklə, rəsmi məlumatlara əsasən 2021-ci ilin yanvar-mart aylarında ölkəni 63 713 nəfər həmişəlik tərk edib. Apreldə bu göstərici hələ 16 827 nəfər artıb, mayda isə 8 314 nəfər təşkil edib. Beləliklə, ilin birinci 5 ayı ərzində sərnişin axınının mənfi saldosu artıq 90 000-ə yaxınlaşıb.