Bolqarıstanda prezident və parlament seçkiləri keçirilir

Prezident və parlament seçkilərinin eyni vaxtda keçirildiyi Bolqarıstanda seçki məntəqələri açılıb.

"Report” xarici mətbuata istinadən xəbər verir ki, ölkənin 31 seçki dairəsinə (daha bir dairə xaricdə səs verən vətəndaşlar üçün nəzərdə tutulub) bölünüb. Seçki dairələrində ümumilikdə 11 874 seçki məntəqəsi açılıb. Ölkənin Mərkəzi Seçki Komissiyası tərəfindən qeydə alınmış seçicilərin ümumi sayı isə 6,6 milyon nəfərdir.

Bu il üçüncü dəfə keçirilən parlament seçkilərində 27 partiya iştirak edir. Qeyd edək ki, qanunvericiliyə uyğun olaraq yalnız 4 faizlik baryeri keçənlər Milli Məclisə keçəcək.