Qırğızıstan-Tacikistan sərhədində kütləvi iğtişaş: 60-dan çox adam yaralanıb

Qırğızıstan-Tacikistan sərhədində kütləvi iğtişaş baş verib, nəticədə onlarla adam xəsarət alıb.APA-nın “24.kg” və “fergana.ru” saytlarına istinadən verdiyi məlumata görə, hadisə mayın 7-də axşam saatlarında qeydə alınıb. Kütləvi davada Qırğızıstanın Orto-Boz və Tacikistanın Xocalı kəndlərinin sakinləri iştirak edib. Hadisə yerinə gələn hüquq-mühafizə orqanlarının əməkdaşları vəziyyəti nəzarətə götürmək üçün silahdan istifadə etmək məcburiyyətində qalıblar. Qırğızıstan sərhəd xidmətinin yaydığı məlumata görə, iğtişaşlar nəticəsində Tacikistan vətəndaşları Qırğızıstan ərazisində yerləşən yanacaq-doldurma məntəqəsini, habelə mağaza və iki yük avtomobilini yandırıblar. Qırğızıstan tərəfi 30 nəfərin, Tacikistan tərəfi isə 60-dan çox adamın xəsarət aldığını bildirib. Versiyaların birinə görə, münaqişəyə səbəb taciklərin Qırğızıstan vətəndaşının olduğu maşına daş atmaları olub. Digər versiyaya əsasən, sərxoş qırğızlar tacik əsilli sakinin maşınını daşqalaq ediblər.ANN.Az