Əsir düşən rus əsgərləri Ukrayna xalqından üzr istədi

 

Əsir düşən rus əsgərləri Rusiya Hərbi Hava Qüvvələrinin Ukraynadakı məktəbləri, xəstəxanaları və uşaq bağçalarını bombaladığını eşitdiklərini söyləyərək, Rusiya prezidenti Vladimir Putinin işğalının "dəhşətli səhv" olduğunu etiraf edib.

Əsirlərdən biri-  Sergey Qalkin çıxışı zamanı göz yaşlarını saxlaya bilməyib və Putinin göstərişi ilə ölkələrini işğal etdikləri üçün ukraynalılardan üzr istəyib.

 

İşğalı fəlakət kimi qiymətləndirən Qalkin deyib ki, Putin onlara "Ukraynanı işğal etmək, Kiyevi ələ keçirmək və onu Ukraynadakı iddia edilən faşizm və zülmdən qorumaq” əmrini verib. 

"Bu torpaqları işğal etdiyimizə görə öz adımdan və komandam adından Ukraynanın hər evindən, hər küçəsindən, hər bir vətəndaşından, ağsaqqalından, qadınından və uşağından üzr istəyirəm", o deyib.

Rusiyanın 16-cı motoatıcı briqadasının əsir düşən əsgəri Maksim Çernik də Rusiyanın hücumunda iştirakçı olduğuna görə peşmanlığını dilə gətirib.

 

"Nə qədər böyük səhv etdiyimizi anlamaq dəhşətli hiss idi. Bütün bunların düzəldilməli olduğunu və hansısa yolla münasibətlərin yaxşılaşdırılmasının lazım olduğunu başa düşürük. Bu, bir ildən çox vaxt aparacaq. Onilliklər, bəlkə də əsrlər çəkəcək. Burada baş verənlərdən sonra, bütün bunlardan sonra mən mövcud olmaq istəmirəm", o bildirdi.

 

Fevralın 24-də Rusiya Ukraynaya qarşı hərbi əməliyyatlara başlayıb.