Rusiya Ukraynada yeni hücuma hazırlaşır - NATO-nun baş katibi

Ukraynadakı rus qoşunları geri çəkilmir, əksinə yenidən qruplaşır. Bunu NATO-nun baş katibi Yens Stoltenberq cümə axşamı Moskvanın Kiyev və Çerniqov istiqamətlərində "döyüş əməliyyatlarının intensivliyinin kəskin şəkildə azaldılması" ilə bağlı bəyanatı şərh edərkən bildirib. 

Stoltenberqin sözlərinə görə, alyans Rusiya tərəfin Ukrayna ilə apardığı  danışıqlardaverdiyi sözlərin səmimiliyə əmin deyil, çünki Moskvanın hərbi məqsədləri Ukraynaya müdaxilə başlayandan bəri dəyişməyib.


İstanbulda Rusiya-Ukrayna danışıqları başa çatdıqdan sonra Rusiya Müdafiə Nazirliyinin nümayəndəsi Kiyev və Çerniqov istiqamətində hərbi əməliyyatların intensivliyinin köklü şəkildə azaldığını bəyan edib.


"Kəşfiyyatımıza görə, rus bölmələri geri çəkilmir, onlar yeni mövqelərə keçirlər. Rusiya onları Donbasda hücum üçün yenidən qruplaşdırmağa, gücləndirməyə və yenidən təchiz etməyə çalışır”, - Stoltenberq Brüsseldə jurnalistlərə açıqlamasında deyib.


"Eyni zamanda, Rusiya Kiyevə və digər şəhərlərə təzyiqlərini davam etdirir. Ona görə də biz Ukrayna xalqına daha çox zərbə vuracaq yeni hücum əməliyyatları gözləyirik”,  - NATO baş katibi deyib. 

"Biz Rusiyanın hərəkətlərində  real dəyişiklik görmürük... Onlar öz məqsədlərinə hərbi yolla nail olmaqda davam edirlər”, - NATO-nun baş katibi vurğulayıb.


www.anews.az