Rusiya qazının Ukrayna ərazisindən tranziti üçün müraciətlər azalıb

Rusiya qazının Ukrayna ərazisindən tranziti üçün Avropadan olan istehlakçıların müraciətləri 6,4% azalaraq sutkada 92,4 milyon kubmetr təşkil edib. Bu barədə "Ukrayna Qaz Nəqliyyat Sistemi Operatoru”nun məlumatında deyilir.

Rusiya tərəfdən "Suca” və "Soxranovka” stansiyaları vasitəsilə xammalın vurulması üçün nominasiyalar Avropadakı tələbat əsasında formalaşır. Mayın 7-nə olan məlumata görə, göstərici 92,4 milyon kubmetr təşkil edib. Dünən bu rəqəmin 98,7 milyon kubmetrə olduğunu nəzərə alsaq, 6,4% azalma olduğu məlum olur.

Xatırladaq ki, Rusiyanın qaz ixracatçısı "Qazprom” şirkətinin 2022-ci il üçün Ukraynaya tranzitlə bağlı müqavilə öhdəlikləri 40 milyard kubmetr təşkil edir. Bu, sutkada təxminən 109,6 milyon kubmetr deməkdir. Tranzit həcmlərinin azalması "vur və ya ödə” prinsipininin əks olunduğu tranzit müqaviləsinin pozulmasına dəlalət etmir.

Polşa qaz dəhlizinə gəlincə, bu həftə Belarus və Polşadan keçərək Almaniyaya gedən "Yamal-Avropa” boru kəməri ilə tutum üzrə müraciətlər həm birbaşa, həm də əks istiqamətdə etibarlıdır. Yeni sxem üzrə Rusiya xammalına rublla ödəniş etməkdən imtina edən Polşa indi məhz "Yamal-Avropa” marşrutu ilə Almaniyadan analoji həcmdə qaz alır.