Türkiyənin pilotsuz təyyarəsi yeni raket alacaq

Türk Havacılık və Uzay Sanayii (TUSAŞ) İHA sistemləri üzrə inkişaf şirkətinin baş direktorunun müavini Ömər Yıldızın sözlərinə görə, yeni Kuzgun raketi Türkiyənin Anka pilotsuz təyyarəsinin arsenalına ayın sonuna kimi daxil olacaq. 

Anka Türkiyə Silahlı Qüvvələri üçün hazırlanmış pilotsuz təyyarələrdəndir. Pilotsuz təyyarə türkcə Zümrüd-ü Anka adlanan mifoloji feniksin adını daşıyır. Anka-nın yaradılması üzərində iş 2004-cü ildən davam edir. Dron ilk uçuşunu 2010-cu ildə edib. TUSAŞ pilotsuz təyyarənin iki versiyasını - Anka-A və Anka-B-ni inkişaf etdirdiyini açıqlayıb. Birincisi müşahidə, patrul və kəşfiyyat üçün nəzərdə tutulub. Anka-B raketlər və hava bombaları ilə silahlanmış zərbə pilotsuz uçuş aparatı olacaq.

Reaktiv mühərrikli "Kuzqun” raketinin çəkisi 100 kq-a qədərdir. Raket 60-90 kq ağırlığında döyüş başlığı daşıya bilir. Raket bərk yanacaq daşıyıcı sistemi ilə təchiz edilib, onun sayəsində o, uzun məsafələri qət edir.

Yeni raketin Anka-nın istifadə etdiyi kiçik ölçülü MAM-C və MAM-L sursatlarını tamamlayacağı bildirilir. Pilotsuz təyyarə həmçinin okeanda akustik məlumat toplamaq üçün nəzərdə tutulmuş Sonobuoy cihazını və dəniz minalarını aşkar etmək üçün SAR radarını daşıya biləcək.

Bundan əvvəl bildirilmişdi ki, Türkiyə NATO-ya üzv olmaq istəyini dəstəkləsə, Finlandiya Türkiyə istehsalı olan pilotsuz təyyarələr almağı düşünə bilər.