222 milyon uşağın təhsili yarımçıq qalıb - STATİSTİKA

Dünyada 222 milyon uşağın təhsili  müxtəlif və çox sayda böhranlardan  dolayı yarımçıq qalıb. Bu  Birləşmiş Millətlər Təşkilatının fövqəladə hallar və uzadılmış böhran zamanları üçün nəzərdə tutulan  "Education Cannot Wait"(Təhsil Gözləyə Bilməz) qlobal fondunun  araşdırmasında  göstərilib. 

Təşkilatın direktoru Yasmin Şerifin sözlərinə görə,  son altı ildə müxtəlif böhranlar səbəbilə bu rəqəm 40-dan çox ölkədə artıb. 

Belə ki, təşkilat yarandığı ildə ( red. 2016) belə şəxslərin sayı 75 milyon təşkil edib. 

"Dünya boyu münaqişələr əvvəl də mövcud olub, amma getdikcə daha uzunmüddətli olur. Münaqişələr və iqlimlə əlaqədar fəlakətlər səbəbilə artan və rekord həddə çatan qaçqın və didərginlərin sayı  COVID-19 pandemiyasında rekord göstəriciyə çatdı,"-  Yasmin Şerif deyib.

Araşdırmaya görə, dünyada  78.2 milyon insan məktəbdən çıxıb. 

Təhsil üzrə ekspertlər deyir ki, həmin uşaqların təhsillərini davam etdirmək ehtimalları azdır. 

Hesabata görə, Yasmin  Şərif əksər uşaqların məktəbə getmədiyi ölkələri ziyarət edib. O,  Mali, Çad, Mərkəzi Afrika Respublikası və Cənubi Sudan kimi böhranın bürüdüyü ölkələrdə uşaqların başına gələn hadisələrə şahidlik etdiyini qeyd edib.

"Məktəbə getməyəndə - oğlansansa - məcburi şəkildə silahlı qruplara, terrorçu qruplara, yarı-hərbi dəstələrə, hökumət qruplarına qoşulmaq təhlükəsi ilə üzləşirsən. Qızsansa, evdə gender-əsaslı zorakılıq, cinsi zorakılıq, insan qaçaqçılığı, erkən evlilik və erkən doğuş riski ilə üzbəüz qalırsan", - hesabatda təşkilatın direktoru qeyd edib.