İngiltərə ilk dəfə Rusiya enerjisindən tamamilə imtina etdi

Böyük Britaniya ilk dəfə Rusiya enerji məhsullarının idxalından tamamilə imtina edib. 2021-ci ildə Britaniya idxalının təxminən 4%-i Rusiya qazı, 11%-i isə Rusiya neftinin payına düşüb.

Böyük Britaniyanın Milli Statistika İdarəsinin (ONS) məlumatına görə, iyunda Rusiyadan digər malların idxalı da 33 milyon funt-sterlinqə (39 milyon dollar) düşüb ki, bu da 1997-ci ilin yanvarından bəri ən aşağı səviyyədir.
Ən son məlumatların dərci Ukraynada Müstəqillik Gününün qeyd edilməsinə və başqa bir kədərli tarixə təsadüf etdi: elə həmin gün, Rusiyanın hərbi təcavüzünün başlamasından düz altı ay keçir.

Nəticədə, Avropa İttifaqı bir il ərzində Rusiyadan qaz idxalını üçdə iki azaltmaq, həmçinin ilin sonuna qədər dəniz yolu ilə çatdırılan bütün Rusiya neftinin idxalını qadağan etmək qərarına gəlib.

ABŞ Rusiya qazı və neftinin idxalına tam qadağa qoyub. Britaniya da öz növbəsində ilin sonuna qədər Rusiya neftinin idxalını tamamilə dayandırmaq və mümkün qədər tez Rusiya qazının alınmasını dayandırmaq öhdəliyi götürüb.

Moskvanın Ukraynada başlatdığı müharibə ilə əlaqədar Qərb ölkələri Rusiyaya qarşı sərt sanksiyalar tətbiq etdikdən sonra Rusiya mallarının idxalında, eləcə də Rusiyaya ixracında ümumi azalma başladı.

Belə ki, Böyük Britaniyanın Rusiyaya dəzgah və nəqliyyat avadanlıqlarının satışı iyuna qədər 91,3%, ümumilikdə isə Rusiyaya ixrac 2022-ci ilin fevral ayına qədər olan ilin orta aylıq göstəricisi ilə müqayisədə demək olar ki, 70% azalıb.

Rusiyaya ixracı cüzi artan yeganə mallar dərmanlar və sanksiyalara məruz qalmayan digər əczaçılıq məhsulları olub.


www.anews.az