Sberbank neft-qaz sektorunda 3 trilyon rubl dəyərində layihələrə baxılacağını açıqlayıb

Sberbank neft və qaz layihələrini dəstəkləməkdə maraqlıdır, ona görə də hazırda dəyəri təxminən 3 trilyon rubl olan yeni layihələr nəzərdən keçirilir. Bunu Sberbank İdarə Heyəti sədrinin birinci müavini Aleksandr Vedyaxin deyib.


"Rusiya iqtisadiyyatı üçün əsas bank olan Sberbank irimiqyaslı neft və qaz layihələrini dəstəkləməkdə maraqlıdır. İndi biz təxminən 3 trilyon rubl dəyərində yeni neft-qaz layihələrini nəzərdən keçiririk. Biz həmçinin bazarın dost valyutalara, xüsusən də yuana yönəldiyini görürük”, - Vedyaxin bildirib.


Onun sözlərinə görə, hazırda investisiya layihələrinin, o cümlədən yeni bazarlara yönəldilmiş layihələrin icrası davam etdirilir. Yeni layihələrin konfiqurasiya tələb etməsinə baxmayaraq, şirkətlər onların həyata keçirilməsinə marağını itirməyib.


O əlavə edib ki, neft-qaz şirkətləri artıq sanksiyaların təsirini, eləcə də dövlətin əlavə büdcə vəsaitlərinə ehtiyacını hiss ediblər. Bununla belə, investisiyaların azlığını nəzərə alsaq, vergi yükünün artması sənayenin gələcək inkişafını çətinləşdirə bilər. Ona görə də dövlətlə biznes arasında kompromis tapmaq lazımdır.

www.anews.az