Krasnodarda ölənlərin sayı 4 dəfə artdı

Krasnodar vilayətinin Yeysk şəhərinin yaşayış massivində Su-34 hərbi təyyarəsinin qəzaya uğraması nəticəsində həlak olanların sayı 13 nəfərə çatıb.  TASS xəbər verir ki, bu barədə Rusiya Fövqəladə Hallar Nazirliyinin mətbuat xidmətindən məlumat verilib.

"Xilasedicilər dağıntıların çıxarılmasını başa çatdırıblar. Axtarış-xilasetmə əməliyyatları zamanı 10 nəfərin cəsədi tapılıb. Beləliklə, ölənlərin ümumi sayı üçü uşaq olmaqla 13 nəfər olub. Fövqəladə hadisə nəticəsində 19 nəfər xəsarət alıb", - nazirliyin sözçüsü bildirib.

Oktyabrın 17-də axşam saatlarında Su-34 bombardmançı təyyarəsi Yeysk şəhərinin yaşayış massivinə düşüb. Müdafiə Nazirliyinin məlumatına görə, buna səbəb uçuş zamanı mühərriklərdən birinin alışması olub. Qəza zamanı ətrafa dağılmış yanacaq alovlanıb, alov yaşayış çoxmərtəbəli binaya keçib, nəticədə birinci mərtəbədən 9-cu mərtəbəyə qədər yanğın başlayıb.

 

Aytac