Soçidə Putinlə Paşinyan arasında görüş başlayıb - VİDEO

Vladimir Putin Soçidə Nikol Paşinyanla görüşündə deyib ki, "Qarabağ münaqişəsinə nə vaxtsa son qoyulmalıdır”.

 

"Mən bilirəm ki, sizin bunun üçün siyasi iradəniz var və biz bunu hər cür dəstəkləyirik", - Rusiya prezidenti Ermənistanın baş nazirinə deyib.

Öz növbəsində Paşinyan bildirib ki,  İrəvan üçün Rusiyanın Dağlıq Qarabağ məsələsində yanaşmaları məqbuldur.

 

"Azərbaycan qoşunlarının Qarabağdakı Rusiya sülhməramlılarının məsuliyyət zonasından çıxarılması Ermənistan üçün çox vacibdir. Ermənistan Azərbaycan Silahlı Qüvvələrinin öz suveren ərazilərindən çıxarılması ilə bağlı Rusiya Federasiyasının dəqiq mövqeyinə ümid edir",  -  Paşinyan deyib. 

"RİA Novosti” xəbər verir ki,  Görüş Soçidəki "Rus” sanatoriyasında keçirilir. Putin "Boçarov ruçey" iqamətgahı ilə yanaşı Putin burada da ənənəvi olaraq xarici qonaqları  qəbul edir.

Bazar ertəsi elə həmin yerdə, "Rus"da Rusiya Federasiyası-Ermənistan-Azərbaycan üçtərəfli sammitinin keçirilməsi planlaşdırılır. Orada dövlət başçıları Qarabağdakı vəziyyətin nizamlanması məsələsini müzakirə edəcəklər. Sammitdə tərəflər gələcək sülh müqaviləsinin əsasını təşkil edəcək sənədin qəbuluna gələ bilərlər.

Liderlər Rusiya sülhməramlılarının mandatının 10-20 il uzadılması məsələsinə də toxuna bilərlər.

Bundan əvvəl Nikol Paşinyan oktyabrın 31-də Soçidə Dağlıq Qarabağdakı Rusiya sülhməramlılarının mandatının 10-20 il müddətinə uzadılması ilə bağlı sənəd imzalamağa hazır olduğunu bildirib.

Rusiya Federasiyası Prezidentinin mətbuat katibi Dmitri Peskov oktyabrın 31-də Rusiya prezidenti Putin, Azərbaycan prezidenti İlham Əliyev və Ermənistanın baş naziri Nikol Paşinyanın üçtərəfli görüşünün keçiriləcəyini təsdiqləyib.