ABŞ Dövlət Departamenti Əkrəm İmamoğlunun həbsinə münasibət bildirib

ABŞ Dövlət Departamenti Türkiyə məhkəməsinin İstanbul Böyük Şəhər Bələdiyyə sədri Əkrəm İmamoğlu barəsində iki il 7 ay həbs cəzası və siyasi fəaliyyətinə qadağa qoymasının ABŞ-ı dərindən narahat və məyus etdiyi bildirib. Bu barədə Departamentin sözçüsü Ned Prays məlumat verib.
 
 "Onun məhkumluğu insan hüquqlarına, əsas azadlıqlara və qanunun aliliyinə hörmətlə uzlaşmır. Biz Türkiyədə vətəndaş cəmiyyətinin, medianın, siyasi və biznes liderlərinin, o cümlədən uzunmüddətli məhkəməyəqədər həbsdə saxlanma, terrora dəstək haqqında həddən artıq geniş iddialar və cinayət xarakterli təhqirlərlə bağlı davam edən məhkəmə təzyiqindən ciddi şəkildə narahatıq”, - Ned Prays bildirib.
 
Departamentin sözçüsü Türkiyə xalqının öz insan hüquqlarını və əsas azadlıqlarını qisas qorxusu olmadan həyata keçirməyə layiq olduğunu ifadə edib. O bildirib ki,  ifadə, dinc toplaşma və birləşmək azadlıqlarından istifadə etmək hüququ Türkiyənin konstitusiyasında, beynəlxalq hüquq öhdəliklərində və ATƏT qarşısındakı öhdəliklərində təsbit edilib.
 
 "Biz hökuməti cinayət "təhqir” qanunlarına əsasən təqibi dayandırmağa və ictimai müzakirələr üçün açıq mühit təmin etməklə bütün Türkiyə vətəndaşlarının hüquq və azadlıqlarına hörmət etməyə çağırırıq”, - Ned Prays vurğulayıb.
 
Dekabrın 14-də İstanbul Böyük Şəhər Bələdiyyəsinin sədri Əkrəm İmamoğlu Mərkəzi Seçki Komissiya nümayəndələrini təhqir etdiyinə görə 2 il 7 ay müddətinə azadlıqdan məhrum edilib. Siyasətçi, eyni zamanda, siyasi fəaliyyətlə məşğul olmaq hüququndan məhrum edilib.
 

www.anews.az