İsveç nümayəndəsi İran səfirlərinin Avropa Birliyindən çıxarılmasını tələb edib

İsveçin Avropa Parlamentindəki nümayəndəsi İran səfirlərinin Avropa Birliyindən çıxarılmasını tələb edib. Bu barədə İran mediasında məlumat yayılıb.


Əbir Əl Səhlani  bunun Tehran hökumətinin Fransaya qarşı təhdidlərinə cavab olaraq həyata keçirilməsini istəyib.

"İran hökumətinin karikaturaya görə başqa bir ölkəni təhdid etməsi sadəcə gülüncdür və mollaların nə qədər qorxduğunu açıq şəkildə göstərir”- o vurğulayıb.

 

Fransanın "Şarli Abdo" nəşri son sayında İran liderinin İranda xalq etirazların yatırılmasındakı rolu mövzusunda karikaturalarını dərc etdikdən sonra Tehran rejimi Fransanı təhdid edib.

 

Daha əvvəl Fransanın Tehrandakı səfiri Nikolas Roş Fransanın xarici işlər naziri Ketrin Kolonnanın açıqlamalarına görə İran Xarici İşlər Nazirliyinə çağırılıb.

İran Xarici İşlər Nazirliyindən verilən açıqlamada Fransanın xarici işlər naziri Ketrin Kolonnanın parlamentdəki qəbuledilməz açıqlamaları və parlamentin İranda baş verən hadisələrlə bağlı müdaxiləci qərarının parlamentdə təsdiq edilməsinə cavab olaraq səfir Roşun Xarici İşlər Nazirliyinə çağırıldığı qeyd edilib.

Açıqlamada rəsmi Parisin İrana qarşı əsassız ittihamları pislədiyi və bu ittihamların qəbuledilməz olduğu bildirilib.

"Fransa və bəzi digər Avropa ölkələrinin insan haqları məsələsindən sui-istifadə etdiyi" vurğulanan açıqlamada "Bu ölkələrin millətlərin hüquqlarına zidd olan təktərəfli və məcburi yanaşmalara əl ataraq insan haqları iddiaları irəli sürmək səlahiyyəti yoxdur" deyilib.

Açıqlamada Fransa səfiri Roşun məsələni rəsmi Parisə çatdıracağı bildirilib.

 

Aytac