İranda Avropa Birliyinin nümayəndəliyi açılacaq

Avropa Birliyinin (AB) Xarici Əlaqələr Komitəsi aprelin 1-də İranla bağlı qətnamə layihəsi qəbul edib. APA-nın “Radiofərda”ya istinadən verdiyi məlumata görə, “Avropa Birliyinin İranla bağlı strategiyası” adlanan sənəd 7 səhifədən və 23 bölmədən ibarətdir. Qətnamədə İranın nüvə proqramı, İran və AB arasında əlaqələrin perspektivləri, regional məsələlər, insan haqları, xüsusilə etnik azlıqların hüquqları və s. məsələlər öz əksini tapıb. Sənəddə bu ilin sonunadək Tehranda AB-nin nümayəndəliyinin açılmasının planlaşdırıldığı qeyd edilib.

Sənəddə İranda bəzi vicdan məhbuslarının azadlığa buraxılması alqışlanıb, ancaq bütün siyasi məhbusların, insan haqları fəallarının, həmkarlar təşkilatları üzvlərinin, o cümlədən 2009-cu ildə keçirilmiş mübahisəli prezident seçkiləri zamanı həbs edilmiş bütün şəxslərin sərbəst buraxılması istənilib.

AB Xarici Əlaqələr Komitəsi prezident Həsən Ruhaninin ölkə vətəndaşlarının hüquqlarının təmin ediləcəyi ilə bağlı verdiyi vədə baxmayaraq, İranda hələ də işgəncə, ədalətsiz məhkəmə qərarları, edam xəbərlərinin davamlı olmasının dərin narahatlıq doğurduğunu bildirib.

Qətnamədə rəsmi Tehrandan BMT-nin İranda insan haqları üzrə xüsusi məruzəçisi Əhməd Şəhidin fəaliyyətini dəstəkləməsi və onun bu ölkəyə səfərini dərhal və qeyd-şərtsiz təmin etməsi tələb edilib.

Sənəddə AB nümayəndə heyətlərinin İrana səfəri zamanı müxaliflər, vətəndaş cəmiyyəti fəalları və siyasi məhbuslarla görüşmək məsələsinə dair öhdəlik daşıdıqları da vurğulanıb. 

ANN.Az