Misirdə sərnişin qatarı relsdən çıxıb, ölən və xəsarət alanlar var

Misirin şimalındakı Qalyub şəhərində dəmir yolu stansiyası yaxınlığında sərnişin qatarı relsdən çıxıb, nəticədə bir nəfər ölüb, daha 16 nəfər yaralanıb.

Bu barədə "Al-Yaum əs-Sabia" portalı Ərəb Respublikası Səhiyyə Nazirliyinin rəsmi nümayəndəsinə istinadən məlumat yayıb.

"İlkin məlumatlara görə, bir nəfər ölüb, 16 vətəndaş yaralanıb, onlardan üçü hadisə yerində yardım alıb", - portal nazirliyin sözçüsünə istinadən yazır.

Qatar Minuf şəhərindən Qahirəyə gedirmiş. Qəza nəqliyyat vasitəsi Qalyub şəhərində dəmir yolu stansiyasından keçərkən baş verib.

 

Hadisə yerinə 20 təcili yardım maşını göndərilib, zərərçəkənlər şəhər xəstəxanasına aparılıb.