Ukrayna Rusiya ilə diplomatik münasibətləri dayandırır

Bu gün deputat Oleq Lyaşkonun təşəbbüsü ilə Ukrayna Ali Radasının katibliyində Rusiya ilə diplomatik münasibətlərin dayandırılması və Ukrayna-Rusiya müqavilələrinin etibarsız sayılması haqqında qanun layihəsi, Avropa İttifaqı və NATO-ya daxil olmaqla bağlı ərizə qeydiyyata alınıb.

Trend-in İTAR-TASS-a istinadən verdiyi məlumata görə, sənəddə Ali Rada tərəfindən təyin edilən Ukraynanın müvəqqəti prezidentindən "silahlı qüvvələrin tam döyüş hazırlığını elan etmək, Ukraynanın hərbi vəzifəli vətəndaşlarının ümumi səfərbərliyini keçirmək və xalq qoşunu dəstələri yaratmaq", "müasir hərbi texnika və silahlar şəklində maksimum maddi-texniki kömək göstərilməsi", "Rusiya Federasiyası ilə diplomatik münasibətləri kəsmək" və viza rejimini tətbiq etmək haqqında xahişlə ABŞ və NATO üzvü olan digər ölkələrin hökumətlərinə müraciət etmək tələb olunur.

Həmçinin Qara dəniz donanmasının statusu və qalma şəraiti haqqında saziş, eləcə də dostluq, əməkdaşlıq və tərəfdaşlıq haqqında müqavilənin etibarsız sayılması təklif edilir.

Bundan başqa, Ukrayna ərazisindən Avropa ölkələrinə Rusiya qazının tranzit dəyərini min kubmetrə görə 500 dollar məbləğində müəyyən etmək və Rusiya Federasiyası tərəfindən göstərilən qiymətin ödənilməsi rədd ediləcəyi halda, qaz nəqlini dərhal dayandırmaq təklif edilir.

Güc idarələrinə Ukraynanın şərqində "istənilən separatçı fəaliyyətin dayandırılması məqsədilə sərt tədbirlər görülməsi, Ədliyyə Nazirliyi və Baş Prokurorluğa isə Kommunist Partiyası və Regionlar Partiyasının fəaliyyətinə qadağa qoyulması ilə bağlı məhkəməyə müraciət etmək" təklif olunur. Həmçinin Rusiyanın Ukraynaya qarşı təbliğat müharibəsi aləti kimi istifadə etdiyi televiziya və radio kanalları və mətbuat orqanlarının yayımının dayandırılması təklif edilir.

Separatçı mitinqlərdə iştirak edən Ukrayna vətəndaşlarının "işğalçılıq vasitəçisi" hesab edilməsi, Ukrayna vətəndaşlığından məhrum edilməsi və dövlətə xəyanətə görə cinayət məsuliyyətinə cəlb edilməsi də təklif edilir. Habelə "satqınlara, təxribatçılara, soyğunçulara, qatillərə, fərarilərə və casuslara" ölüm cəzasının tətbiq edilməsi təklif olunur.

ANN.Az