İranda borclarını ödəyə bilməyən azərbaycanlılar evə buraxıldı

 İranda bir aya yaxındır xəstəxanaya borclarını ödəyə bilmədiyindən saxlanılan azərbaycanlı ailə evə buraxılıb.APA-nın İranın “Səhər” telekanalına istinadən verdiyi məlumata görə, bunu qonşu ölkədə ailə qurandan on ildən sonra üçəm dünyaya gətirmiş 33 yaşlı Günay Həsənovanın anası Fatimə Ağayeva bildirib. Onun sözlərinə görə, kömək üçün lazımi dairələrə müraciət etsə də, nəticəsiz qalıb: “Bizim çox böyük pul problemimiz olub, xəstəxananın xərclərini tam ödəyə bilməmişik. Azərbaycan mətbuatında bizim girov saxlanılmağımız, incidilməyimizlə bağlı xəbər yayılsa da, bir nəfər də olsun xəstəxanaya gəlməyib”.   F. Ağayeva deyib ki, İranın Gilan vilayətinin mərkəzi Rəşt şəhərinin Beynəlxalq Həzrəti Qaim Xəstəxanasına olan borclarını tanımadığı və heç bir təşkilatın üzvü olmayan bir nəfər ödəyib: “Həmin şəxs uşaqlarımın xəstəxanadan çıxması üçün lazımi vəsaiti verib”. ANN.Az