Türkiyədə prezident və parlament seçkiləri ilə bağlı məhdudiyyətlər qüvvəyə minir

Türkiyədə 14 may 2023-cü il bazar günü keçiriləcək Prezident və 28-ci çağırış parlament seçkilərinə 10 gün qalmış məhdudiyyətlər qüvvəyə minir.

Bu barədə Yüksək Seçki Şurasının (YSK) müvafuq qərarında deyilir.

Qeyd olunub ki, səsvermə gününə 10 gün qalmış yazılı, şifahi və videogörüntü şəklində namizədlərin lehinə və ya əleyhinə, seçicilərin qərarına təsir edəcək hər hansı yayımın aparılması və sorğuların keçirilməsi qadağan olunur.

Bundan əlavə, seçki gününə dair qərarlar da açıqlanıb. Belə ki, seçki günü saat 06:00-dan 24:00-dək spirtli içkilərin satışı qadağan ediləcək. Yaşayış məntəqələrində təhlükəsizliyin və asayişin qorunmasına cavabdeh olan şəxslərdən başqa heç kim silah gəzdirə bilməyəcək. Seçki günü qəhvəxana, çayxanalar və internet kafe kimi bütün ictimai əyləncə yerləri bağlı olacaq. Restoranlarda yalnız yeməklər verilə bilər. Seçki günü saat 18:00-dan sonra isə toylar keçirilə bilər.

YSK-nın qərarlarına əsasən, saat 18:00-dək mətbuatda seçkilər və onların nəticələri ilə bağlı xəbər proqnozları və şərhlər vermək qadağan ediləcək.

Saat 18.00-21.00 arasında YSK-nın seçki ilə bağlı verəcəyi xəbərlər və bildirişlər dərc olunacaq. Saat 21:00-dan sonra bütün yayımların aparılması sərbəst olacaq.

Seçkilərinin ikinci tura keçəcəyi təqdirdə eyni müddəalar mayın 28-də də tətbiq olunacaq.

www.anews.az