Braziliya Rusiya dizelinin ikinci ən böyük alıcısı oldu

Braziliya avqustda rekord həcmdə Rusiya neft məhsullarını idxal edir - gündə təxminən 235 min barel. Bu barədə "Bloomberg” "Kpler” analitik şirkətinin məlumatlarına istinadən xəbər verir.

Bu, iyul ilə müqayisədə 25% çoxdur. Beləliklə, Rusiya Aİ-nin sanksiyaları fonunda yeni satış bazarları formalaşdırmaqla Braziliyaya ən böyük yanacaq tədarükçüsü rolunda qərarlaşıb.

Nəşrin hesablamalarına görə, Avropa İttifaqı fevralda Rusiyanın enerji resurslarına embarqo və G7-nin qiymət tavanını tətbiq etdikdən sonra Braziliya idxalı kəskin şəkildə artırıb: ölkə Türkiyədən sonra Rusiya dizel yanacağının ikinci ən böyük alıcısına çevrilib.

Qərbin məhdudiyyətləri Rusiya enerjisinin qiymətini aşağı salıb və bu, Braziliyaya xeyir verib. Kpler-in eksperti Viktor Katona hesab edir ki, ucuz rus dizelinin alınması Braziliyanın barreli üçün 10-15 dollara qənaət edəcək.

Dizel yanacağı ilə yanaşı, iyundan etibarən Rusiya Braziliyaya benzin tədarük etməyə başlayıb və tezliklə nafta ixracı başlaya bilər. Katona bildirib ki, Qərbin təzyiqlərinə baxmayaraq, Braziliya Ukrayna münaqişəsi fonunda neytral qalır və Rusiyadan sərfəli enerji almağa davam edəcək.

Həftənin əvvəlində Pakistan Rusiya Federasiyasından neftin emalı ilə bağlı problemlərin mövcudluğunu təkzib edib.


www.anews.az